بوتيكات لـ أحمد فؤاد نجم

بوتيكات النات كوا نَّات
وشقق مفروشه وعمولات
يا حلاوه الناوه كوا النّاوه
يا بلدنا يا آخر فتاكات
بوتيكات النات كوا النَّات

***
شبيك لبيك فتح مخك
لبيك شبيك غمض عينك
حتقفّل مخك ح نطخك
ونلوشك لو تفتح عينك
ركب قرنين تركب مازدا
وتعيش سلطان في البرواز دا
مش عاجبك فالجبنة الفاسدة
والعيش والفول والكرَّات
يا حلاوة الناوه كوا النّاوه
يا بلدنا يا آخر فتاكات
بوتيكات النات كوا النَّات

***
مين فيكوا ما يعرفش عليوه
شيّال المينا الكحيان
في ثواني اتمول واتحول
بقي مسيو عليوه عليَّان
إزاي؟
ما هي بوظه ومفتوحه
على حس ولاد المفضوحه
وأرانب صاحيه ومدبوحه
تتأستك تبع البنوكات
يا حلاوه الناوه كوا الناوه
يا بلدنا يا آخر فتكات
بوتيكات النات كوا النَّات

***
حتقول الفقرا ومشاكلهم
دي مسائل عايزه التفانين
وأنا رأيي نحلها رباني
ونموّت كل الجعانين
وبهذا ما حدش حيجوع
لو نعلن هذا المشروع
وح نقفل هذا الموضوع
نهائيًا
ونعيش في تبات
يا حلاوه الناوه كوا النّاوه
يا بلدنا يا آخر فتكات
بوتيكات النات كوا النَّات