ممنوع من السفر
ممنوع من الغنا
ممنوع من الكلام
ممنوع من الاشتياق
ممنوع من الاستياء
ممنوع من الابتسام
***
وكل يوم فى حبك
تزيد الممنوعات
وكل يوم بحبك
أكتر من اللى فات
***
حبيبتى يا سفينة
متشوقه وسجينة
مخبر فى كل عقدة
عسكر فى كل مينا
يمنعنى لو أغير
عليكى أو أطير
إليكي واستجير
بحضنك أو أنام
فى حجرك الوسيع
وقلبك الربيع
أعود كما الرضيع
بحرقة الفطام
***
حبيبتى يا مدينة
متزوقة وحزينة
فى كل حارة حسرة
وف كل قصر زينة
ممنوع من إني أصبح
بعشقك .. أو أبات
ممنوع من المناقشة
ممنوع من السكات
***
وكل يوم فى حبك
تزيد الممنوعات
وكل يوم بحبك
أكتر من اللى فات
0 تعليقات