نيكسون جاء لـ أحمد فؤاد نجم

أَ بَ تَ ثَ جُحٌ
ألفٌ باء
جونسون روّح
نيكسون جاء
قولوا هأوأو
أو قولوا هاء
على صحافتنا
الغير غراء

***
ذات صباح
يا فتاح
بالجرانين على ريق النوم
جم على سهوة
كبسوا القهوة
وابتدأوا ف تضييع اليوم
اللي يقول النصر نميس
ينفع تاكسي
ويمشي رميس
واللي يقول الفورد يا بيه
أجعص من أجعصها جعيص
واللي يقول جونسون دا حمار
راجل عقله
عقل صغار
من غير حيث
راجل تيس
ينصب ألف جنازة بطار
بس أهو راح
وحنرتاح
وحنتبجح بقى ونقول
يخرب بيته
ويدلق زيته
ويعيش نيكسون لنا على طول
نيكسون عال
مش بطال
و اللي يقول غير كدة مقفول
شفت كلامه
إلا كلامه
صح كلام راجل مسؤول
ولاعنيه
يا ختي عليه
فيهم سكس
ما هوش معقول
واللي يقول يا بقر يا شراكسة
نيكسون ماله ومال النكسة
واللي يقول بلوتنا كبيرة
واللي يقول فضوها السيرة
واللي يقول مين المسؤول
واللي يقول...
واللي يقول...

***
شوفو بقى يعني
ما تفلقونيش
آدي صحافتنا
وغيرها مفيش
مش عجباكو؟
ما تلومونيش
قولوا هأوأو
أو قولوا هاء
على صحافتنا
الغير غراء