شيد قصورك لـ أحمد فؤاد نجم

شيد قصورك عالمزارع،
من كدنا وعمل إيدينا

والخمارات جنب المصانع،
والسجن مطرح الجنينة

واطلق كلابك في الشوارع،
واقفل زنازينك علينا

ويقل نومنا في المضاجع،
آدي احنا نمنا ما اشتهينا

واتقل علينا بالمواجع،
إحنا اتوجعنا واكتفينا

وعرفنا مين سبب جراحنا،
وعرفنا روحنا والتقينا

عمال وفلاحين وطلبة،
دقت ساعتنا وابتدينا

نسلك طريق ما لهش راجع،
والنصر قرب من عينينا

شيد، شيد قصورك ع المزارع،
من كدنا وعمل إيدينا