شوف عندك يا سلاملم
واتفرج يا سلام
هزلية مسرحية
على تياترو السلام
سلام كلام أغاني
وعليكم السلام
ما عاد على الغلابة
عايد غير الكلام
والحالة كل مادا
يا سادة يا كرام
واتفرج يا سلاملم
عالمسرح يا سلام
***
سالمة يا سلامة
وداليدا رجعت بسلامة
سالمة يا سلامة
آه يا سالمة يا سلامة
مصرية ومن مواليد شبرا
من تحت نفقها ومجاريها
لو كانوا ما حرقوش الأوبرا
كانت حتنور لياليها
بالغنوة المدهونة شفايف
غرقانة وسايحة ف بلاويها
سيد درويش اللي حيلتنا
سرقوه وباعوه بيعة ندامة
***
سالمة يا سلامة
كوكا كولا جات بالسلامة
سالمة يا سلامة
آه يا سالمة يا سلامة
نشروا الاعلان ملو الجرنان
جوا البراويز الدهبية
والتلفزيون بالصوت واللون
كوكاكولا هي الأصلية
اشرب يا خفيف بطّل تخاريف
بلا طيز الطور بلا وطنية
كوكاكولا تفوق وتروق
ضد الأفكار الهدامة
سالمة يا سلامة
طيري بينا ورفرفي يا حمامة
سالمة يا سلامة
على مصر التانية أم علامة
***
ولادة وحبلى وبكرية
غصبا عن عين اللي باعوها
لا تغير لونها ولا أوانها
ولا تنسى لسانها وضربوها
دي حبال مواويل من فيض النيل
وتسلي ولادها يغنوها
تزرع غناويها بحواريها
على نغمة بكرة البسامة
يا سالمة يا سلامة
تولد وتقوم بالسلامة
0 تعليقات