جايزة نوبل لـ أحمد فؤاد نجم

شوف عندك يا سلاملم
واتفرج يا سلام
مواطن شخص عادي
شد اللحاف ونام
ومبارك المبادرة
ومسميها السلام
وفي يوم قرا الجرايد
تاريخ ما أعرفش كام
من يومها يا ضنايا
بيشقلب في الكلام
واتفرج يا سلاملم
على شقلب يا سلام

***
لما محانم جيبن يادخ
زايجة لوبن (هأ)
يعنى مناحم بيجن
ياخد جايزة نوبل
تبقى النوديا
يعنى الدنيا
ماشية بتحدف بالمندار
تبقى الثانية
اتناشر ساعة
يبقي اليوم
ليلتين ونهار
يبقى القاتل
شخص ضحية
والمقتول مجرم جبار
شفتوا إزاى؟
أما صحيح الطب اتقدم
واحنا ما وصلتناش أخبار

***
أيوه يا لجنة لوبن بيه
قاعدة إزاى بتلجنى إيه
أنا مش فاهم حاجة صراحة
لما القاتل ياخد جايزة
كده من دون تلبيخ وأباحة
يبقي
يا إما اللجنة دى بايظة
أو لا مؤاخذة
رئيسها حمار
يبقي يا لجنة يا عرة يا كوسة
جتنا وجتكو ستين حوسة
يبقي في هذا الزمن المايل
ياما حتجرى علينا هوايل
تبقى اللكمة بدل الكلمة
والكاتب يمسك منشار
يبقى الراعش
يعني الشاعر
يسكن شقه في بيت
في قصيدة
يكتب فول
ياكل أشعار