السيما لـ أحمد فؤاد نجم

شوف عندك يا سلاملم
واتفرج يا سلام

أفلام القرع كوسة
حتقدم فيلم خام

من مخرج الروايح
ومسبب الزكام

عن قصة واقعية
من توليف المدام

والفيلم لجل خاطرك
واخد مليون وسام

واتفرج يا سلاملم
ع السيما يا سلام

***
الناس ملهية وساكتة
والصالة بتشغي عيون

والفيلم مطلع ريحة
والناس مش لاقية لمون

عيل فرحان بشبابه
ومغرق شعره صابون

مشكلته ما بيخلفشي
ومراته كمان بتخون

ودلال بتموت في عطية
وعطيه ماهوش مضمون

لازق ف زبيدة التشة
أخت الأستاذ مأمون

جوز طنط ماريكا اللبوة
اللي مرافقة المأذون

اللي مراته أم قدارة
أخت محمد سعدون

واللي معلق نبوية
بنت الأستاذ مأمون

الفيلم اتعقد خالص
جايبين له شجيع مجنون

دب خناقة في خمارة
وشالوه عالبيت معجون

البطلة هتشرب نجدة
مبروك وصل المأذون