أبجد هوز لـ أحمد فؤاد نجم

أبجد هوَز
حطي كَلمٌ
افتح صفحة
امسك قلمٌ
اكتب زي الناس ما بتنطق
سقطت سايجون رفعوا العلمٌ
طلعت شمس اليوم ده أغاني
كل ما نسمع نعشق تاني
طلعت شمس اليوم ده حريقة
تكوي الجرح وتبري القلمٌ
سايجون عادت للثوار
فوق الدم وتحت النار
جدو فوجدوا
زرعوا فحصدوا
واحنا إيدينا للسمسار
واللي قالوه السمسارجية
واللي حكاه السمساردار
لما قروه القراونجية
بالمستعدل والمندار
هتش ونتش بعزم الصوت
عن أمريكا وهول أمريكا
زعموا الفانتوم شايل موت
سقط الموت بعلم أمريكا
جتكوا فضيحه ياطبقة سطيحة
وعامله فصيحه وجايبه العار
كتبنجية وفصحنجية
وسمسارجية وسمساردار
سايجون دره يا ثوار
عادت حرة للأحرار
ده إحنا هنشبع بكره أغاني
اسمع واحفظ يا كتباني
واثبت عندك في الأوراق
مصر بتنضح بالأشواق
مصر عروسة وبكرة عريس
والعشاق إحنا العشاق
فينا وبينا ولينا الثورة
إحنا الثوره وهي الناس
فينا الماضي وبينا الحاضر
والمستقبل هما الناس
كل الناس هما الناس