الحمد لله خبطنا لـ أحمد فؤاد نجم

الحمد لله خبطنا
تحت بطاطنا
يا محلا رجعة ظباطنا
من خط النار

يا أهل مصر المحمية
بالحرامية
الفول كتير والطعمية
والبر عمار

والعيشة معدن
وأهي ماشية آخر آشية
مادام جنابه والحاشية
بكروش وكتار

ح تقول لى سينا وما سيناشي
ما تدوشناشي
ما ستميت أوتوبيس ماشى
شاحنين أنفار

إيه يعني لما يموت مليون
أو كل الكون
العمر أصلا مش مضمون
والناس أعمار

الحمد لله وأهي ظاطت
والبيه حاطط
في كل حتة
مدير ظابط
وإن شالله حمار

إيه يعني فى العقبة جرينا
ولا في سينا
هى الهزيمه تنسينا
إننا احرار

إيه يعني شعب في ليل ذله
ضايع كله
دا كفاية بس أما تقول له
إحنا الثوار

الحمد الله ولا حولا
مصر الدولة
غرقانة فى الكدب علاولة
والشعب احتار

وكفايه أسيادنا البعدا
عايشين سعدا
بفضل ناس تملا المعدة
وتقول أشعار

أشعار تمجد وتماين
حتى الخاين
وان شا الله يخربها مداين
عبد الجبار