المحقق:
إنت شيوعي
المتهم:
أنا مصراوي
المحقق:
إنتوا مصايب
إنتوا بلاوي
المتهم:
ممكن أعرف مين الأول
بيكلمني
المحقق:
إحنا نيابة أمن الدولة
المتهم:
طب فهمني .. دولة مين؟؟
المحقق:
دولة مصر
المتهم:
مصر العشة؟
وللا القصر؟
المحقق:
أيوه حنبدي ندور ونلف
حاجه تنرفز خالص
اف
المتهم:
مالك؟ .. شايل طاجن خالك؟
المحقق:
لم لسانك ما تخرفش
المتهم:
أنا ما أقصدش إهانتك طبعا
المحقق:
أيوه استعبط
المتهم:
لأ ما أعرفش
المحقق:
إيه رأيك فى سفارة كوريا؟
المتهم:
إيه رأيك فى قضية مصر؟
المحقق:
مصر فى وحدة
هى وسوريا وليبيا
ولازم ييجى النصر
المتهم:
ييجى منين؟ وإزاى؟ ولمين؟
المحقق:
آدى كلام الشيوعيين
المتهم:
أنا من حقي
المحقق:
حق فى عينك
المتهم:
أنا بتكلم بيني وبينك
المحقق:
يعنى كلام بره التحقيق؟
المتهم:
إذا كانش يسبب لك ضيق
المحقق:
طيب قول
المتهم:
مين مسئول؟
المحقق:
مين مسئول عن إيه يا أخينا؟
المتهم:
ع اللى جرى لنا ف غزة وسينا
المحقق:
أنت شيوعي أكيد وطاوعني
فض دماغك من دي قضية
شعبنا جاهل
مهما تقول له
مش حيآمن بالشيوعية
المتهم:
ما الشيوعية فى فيتنام
رأيك فيهم إيه يا همام
المحقق:
مش بطال مش بطال
لكن احنا .. ورانا عيال
المتهم:
طب ما نحارب
لجل عيالنا
يطلعوا أسعد من أجيالنا
المحقق:
إنت الظاهر مخك فاضي
وحتتعبني معاك ع الفاضي
وأنا بحبت معاك بكفايه
إبقى اتفلسف عند القاضي
المتهم:
هى قضية؟
المحقق:
لأ ملوخية
أمال فاهم إيه أمال
هى الدولة دي لعب عيال!
المتهم:
ممكن أعرف أنا هنا ليه؟
المحقق:
أيوه حتعرف
أمال إيه
يوم خمسة وعشرين الماضى
إيه مشاك عند التحرير؟
المتهم:
تحرير إيه يا جناب القاضي؟
المحقق:
أنا مش قاضي
المتهم:
بكره تصير
المحقق:
بطل غلبة وجاوب دوغري
المتهم:
أنا غلباوى كده من صغري
المحقق:
كل الشيوعيين امثالك
آخر غلبة وقلة ذوق
يحصل إيه لو تمشي فى حالك
فاكر نفسك مين ما تفوق
المتهم:
لو راح أفوق، مش من مصلحتك
المحقق:
أنا معجب جدا بصراحتك
إيه رأيك فى حكاية الطلبة؟
المتهم:
حاجة عظيمة وبشرة خير
المحقق:
إنت دماغك ينفع جزمة
المتهم:
وانت لسانك ينفع سير
المحقق:
إخرس قطع لسانك .. سافل
المتهم:
كتر خيرك
المحقق:
مخك قافل
مين وداك بقى عند الطلبة؟
رايح ضمن المندسين؟
المتهم:
رحت أناقشهم وأسمع منهم
المحقق:
تسمع منهم إيه ياسي طين
دول عايزيين الدنيا تولع
علشان أصلا مش فاهمين
هى الحرب يا عالم لعبة
دى بتتكلف بالملايين
المتهم:
وانت حتدفع إيه من جيبك؟
المحقق:
أمال حدفع من جيب مين
انت حمار وخدوك فى مشمك
رحت هناك زي الباقيين
عاملين لجنة وقال وطنية
مش ممكن دول وطنيين
وجماعة أنصار الثورة
وفلسطين وهباب الطين
ما نخلينا يا سيدي فى حالنا
مالنا ومال الفدائين
هو إحنا اللى نهبنا بلدهم
دول عالم صيع فاقدين
قتلوا الراجل عند الشيراتون
وإحنا اللى طلعنا القاتلين
المتهم:
وصفى التل ده كلب وخاين
المحقق:
أهو كل العالم خاينين
واحد صاحبي مراته مرافقة
وهو مرافق ييجي عشرين
أمريكا بتزعل وبتحرن
هو إحنا يا عالم ناقصين
مش نستعبر م اللي جرالنا
ونعيش بقى زي العايشين
دى عيال عملا للشيوعية
واحنا عدو الشيوعيين
المتهم:
روق دمك بس شوية
مين مساعدكوا بقالو سنين؟
المحقق:
بيساعدونا صحيح يا سى بعجر
علشان أصلا مش فاهمين
إحنا حيلتنا منين نديهم
ونسددهم بالملايين
المتهم:
هما شافوها قضية مبدأ
المحقق:
مبدأ مين وزكايب مين
هى دي عالم تعرف مبدأ
دول بقول لك ناس مجانين
عملوا السد العالي وغيره
علشان نبقى اشتراكيين
إشتراكية هناك فى بلدهم
وإحنا فى دارنا نعيش حرين
عايزيين الفلاح الجاهل
يتساوى بالمحترمين
وكمان قال تحديد ملكية
أبو ألفين يدوه خمسين
شغل ملاحدة وعالم كفرة
ومخالفين أحكام الدين
والعمال راخرين اسم الله
فاهمين روحهم بنى آدمين
ناس عايزين الحرق بولعة
ودا كله من الشيوعيين
نشروا لنا الأفكار السودة
أولاد الكلب الملاعين
مين وداك بقى عند الطلبة؟
إنطق قول إتكلم مين؟
المتهم:
هما الطلبه إيه مطالبهم؟
المحقق:
إنت بتستجوبني يا شاطر؟
المتهم:
لأ مش قصدي بس أنا بسأل
كانوا طالبين كراريس ومساطر؟
وللا مطالب مية المية
كل الشعب مآمن بيها
المحقق:
دول طالبين حرب وشعبية
مين مجنون بقى حيمشيها
عايزين يدوا الرتش سلاح
عشان تحصل فيها مجازر
أنا لو أشوف حلوف فلاح
شايل شومة لازم أهاجر
المتهم:
لازم بينه وبينك دم
المحقق:
دم في عينك
هس اتلم
ثم نحارب ليه وبإيه
بسلاح ما يموتش بعوضة
المتهم:
روق دمك بس يا بيه
الحرب ضرورة ومفروضة
وأهو نفس سلاحنا المظلوم
في فيتنام دابح أمريكا
المحقق:
دى طبيعة أرض يا بني آدم
المتهم:
بطلوا بقى كدب وبولوتيكا
طب ما الهند بنفس سلاحنا
في باكستان بعزقت الغرب
المحقق:
رأيك يعنى ضروري إن إحنا
وحتما يعنى نخش الحرب
طيب حاضر
فين المخبر
أدي إنت
حتغير رأيك بالضرب
0 تعليقات