كلب الست لـ أحمد فؤاد نجم

فى الزمالك من سنين
وف حما النيل القديم
قصر
من عصر اليمين
ملك واحدة من الحريم
صيتها أكتر م الأدان
يسمعوه المسلمين
والتتر والتركمان
والهنود والمنبوذين
ست فاقت ع الرجال
فى المقام والاحترام
صيت وشهرة وتل مال
يعنى في غاية التمام
قصره يعني هى كلمة
ليها كلمة في الحكومة
بس ربك لجل حكمه
قام حرمها م الأمومة
والأمومة
طبع ثابت
جوه حوا من زمان
تعمل إيه الست
جابت
فوكس رومي وله ودان
فوكس دا عقبال أملتك
عندة دستة خدامين
يعنى مش موجود فى عيلتك
شخص زيه يا إسماعين
وإسماعين دا يبقى واحد
م الجماعة التعبانين
اللي داخوا فى المعاهد
والمدارس من سنين
حب يعمل واد فكاكة
يمشي حبة فى الزمالك
والقيامة والفتاكة
يرموا طبعا ع المهالك
عم سمعة من قيامته
حب يعمل فيها فلة
بعد ما ألوظ بيجامته
اشترى حتة مجلة
قول مشي يقرا فى حكاية
من حكايات الغرام
واندماجة فى القراية
خلا مشيه مش تمام
ع اليمين يحدف بعيد
خطوتين ويروح شمال
لمحه فوكس من الحديد
قال دا صيد
سهل وحلال
هب نط فى كرشه دوغري
جاب بيجامته لحد ديلها
إسماعين بدال ما يجري
قال يا رجلي
رجلي مالها؟
بص شاف الدم سايح
من عاليها ومن واطيها
وياللى جاي
وياللي رايح
المجلة مش لاقيها
حبه واتلموا الظنايا
اللى هما البوابين
والحكاية والرواية
قال لهم
دا كلب مين
كلب مين
ما كلب مينشى
سمعه زود حبتين
قال له واحد منهم
امشى
اللى جابك عنده مين؟
قال دا شارع يا مواشي
والجميع بيمر منه
اللى راكب
اللى ماشي
مستحيل نستغنى عنه
كلمة من دا
وكلمة من دا
ظاطوا واترسمت فضيحة
قول نهايته
القصد من دا
إسماعين أكل الطريحة
راحوا قسم الشرطة طبعا
والنيابة كفيلة بيهم
واترموا في الحجز جمعا
لما ييجي الدور عليهم
حبة والشاويش أمين
قال: سعيد النقشبندي
قام غريم عم إسماعين
قال له:
محسوبك يا افندي
قام سي سمعه
يروح معاه
الشاويش قال:
غور بدمك
راح تعوصني
وفوق قفاه
كف طرقع
داهيه ف أمك
تفتكر يفضل سي سمعه
قد إيه في القسم نايم؟
استضافه الحجز جمعة
يا بلاش
آدي العزايم
شاف بلاوي
ما تتحكيش
م الجماعة المسجونين
قال يا عالم
يا شاويش
يا نيابة
يامسئولين
خلصوه بعد المناهدة
جثة من جحر الديابة
هي يمكن ساعة واحدة
كان فى مكتب النيابة
قال له مالك يا اسماعين
قال له زي البمب.. مالي؟
قال له عضك فوكس فين
قال له سيبنى أروح لحالي
إنت شوف سي فوكس يمكن
خد تسمم
غصب عني
الوكيل قال برضه ممكن
والشاويش قعد يغنى
إنت فين والكلب فين
إنت قده يا اسماعين
طب دا كلب الست يا ابني
وإنت تطلع إبن مين
هيص ياكلب الست هيص
لك مجامك في البوليس
بكره تتولف وزارة
للكلاب ياخدوك رئيس