مجلس الأنس الكريم لـ أحمد فؤاد نجم

أيها المواطنون .. مجلس الأنس الكريم
في بداية الاحتفال .. أشكر الأخ إبراهيم

النهارده جبتكم .. للمناقشة في الإطار
تسمعوني وأقلكم .. هكذا يبقى الحوار

بس قبل الاحتدام .. خلوا بالكوا صحصحوا
حد أثناء الكلام .. يتنقل من مطرحه

كل عام وانتم بخير

النهارده في بلدنا .. أي واحد عنده حق
يبدي رأيه في أي حاجة .. إلا في السياسة .. لأ

إحنا آه ديمقراطية .. بس في حدود الحدود
تيجي شلة ماركسية .. أو مُزايد أو حقود

كل عام وانتم بخير

فيه كلام عن مشكلات .. هم مالهم بالبلد
حد جاع أو حد مات .. كل مولود انولد

فيه تفاوت في المعايش .. أيوه بس الحقد عيب
والمثل بيقول يا غايش .. كل هدمة وليها جيب

كل عام وانتم بخير

أما شغل التنظيمات .. واللي دايرين يلطموا
يبعتولي وفد منهم .. ما اقتنعش ح افرمه

واحنا برضك عيلة واحدة .. والرغيف ح نقسمه
يجي واحد مش فاهمني .. يعني إيه ح نقسمه؟؟

كل عام و انتم بخير

فامشوا أحسن من سكات .. ع الحوار المستقيم
إحنا برضك فلاحين .. نعرف العيب من قديم

وإحنا مجتمع سلام .. والسلام يعني السرور
والتسامح والزهور .. والمحبة والعطور

والمباني والأغاني .. والأماني بالبخور
والمباهج في القصور .. والقناعة في الكفور

واحترام الأغنياء .. زي شارات المرور
والكبير يفضل كبير .. مهما يغلط أو يجور

والصغير مش ضروري .. إنه يكبر أو يثور
والجعان يبوس إيديه .. لو يبات من غير فطور

ليه؟ لأن الشكوى عيب .. والنجوم غير الجذور
هكذا نبني السلام .. والسرور ع الناس يدور

أيها المواطنون .. مجلس الأنس الكريم
في نهاية الاحتفال .. أشكر الأخ إبراهيم