زي النهارده لـ أحمد فؤاد نجم

زى النهارده من زمان
من كام سنه
مفيش لزوم
للعد او للحسبنه
اصل الحكايه
عد عمرك يا جحا
قال: يوم فلس
وخمسه سته عكننه
فلس فلس
يحيا الفلس والجدعنه

***
زى النهارده
الست هانم والدتى
حزقت وقالت بالقليل
يا دهوتى
واتجمعوا نسوان حارتنا
يسمعوا
صرخه قدومى
ويستباركوا بطلعتى
خيبة عقول طبعا
وحركات نسونه

***
لأ والمصيبه
ان الجماعه ما شورونيش
ولا حد قالى
إن كنت آجى
أو ما جيش
قال ليه وليه
ابويا ناغش والدتى
قام شىء حصل بعد المناغشه
ميتحكيش
وابن العرب فى الشىء ده
أحدث ميكنة

***
ليلتها كان الحظ
آخر نعنشه
وكلمتين
فى ضحكتين
بعد العشا
كان القدر جاهز
مجهز خبطته
خبط عبط شوفوا
العجيبه المدهشه
سنيين عذاب
تولدها لحظه سلطنه