دموع إيزيس لـ أحمد فؤاد نجم

الميه قالت للبساط السندسي
غنوة حنين
واستأنفت نفس السفر

***
يا زرع يا اخضر
انت ليه واقف حزين؟
إفرح وصحصح
واستحمى بالقمر

***
والصبح ضي الشمس
ييجي يجففك
ويلفلفك م الزمهرير
دفا وعفا
تطلع نضير

***
تسقي الطيور من فرحتك
تملا الوجود بالزقزقة
واسمع بقى
يا زرع .. يا عمر السنين
ما تقولش عني للزهور
كلام حزين
الكون ما هوش ناقص غضب
الكون ما هوش ناقص أنين

***
صبحت إيزيس
من قبل آلاف السنين
حزينة
مش من غير سبب
أكيد أكيد
كان في سبب

***
نزلت دموع الحزن
أشبه بالسيول
أو بالخيول الجامحة
من ضجيج دق الطبول
شقت لها ع الأرض
مجرى أو مسار
من يومها صار
والنيل مسافر باقتدار
يكسي الشقوق في الأرض
تتفجر حياه
ولا حد عارف منشؤه
ولا فين مداه
الكل قال
والكل عاد
والكل معرفش الميعاد
لكن قليل اللي عرف
إن الدموع
هي اللي شقت للبشر
بين الربوع
نهر الحياة