البلي بم بم
والبلي باه
قال لك إيه
قال لك آه
شربة عجيبة
من تركيبة
بلدي
يابلد البلي بلي با
قال لك إيه
قال لك آه
***
شوف يا مواطن
شوف يا أمير
واسبق شوفك بالتفكير
ناس بيقولو السر ف بير
آدي البير
وآدي غطاه
والبلي بم بم
والبلي باه
قال لك إيه
قال لك آه
***
قال لك كل الفول بيقوّت
قال لك حشو المعدة يموت
قالّ لك صهين
قال لك فوّت
كل دا كذب الناس كاشفاه
زي ماكشفو البلي بلي باه
قال لك إيه
قال لك آه
أي مواطن يا ولداه
زاده الفول لازم تلقاه
عنده البنكرياس بطال
والإمساك فوق الإسهال
عنده الرهقة
عنده الدوخة
عنده أنيميا
عنده عيال
***
قالك ثم الجهل مصيبة
مولّف ويا العيا تركيبة
تشرب منها تعطش تاني
تشرب
تعطش
تشرب تاني
تعطش تشرب
خمسة ف ستة
مية نار لو طالت جتة
لازم تلحس أسمن حتة
يعني العقل يا خلق الله
آدي البير
وآدي غطاه
البلي بم بم
والبلي باه
قال لك إيه
قال لك آه
***
قالك تصبر ع المكتوب
زي ما صبر النبي ايوب
يعني تسليم للميكروب
ياخد رزقه ـبفضل الله
يفضل ينحل وبرك لما
تتفرط من وسط اللمة
خايخ ينخب السوس ف عضاك
خلا قوايمك ماهي شيلات
ويعالجوك الناس
بالصبر
مع انك عيان
بالصبر
قومك صبر
نومك صبر
لحد القبر يا حول الله
***
وحياتك م الدار للنار
تتولف عند العطار
يسقيك الحكمة ف إشعار
ويركب م الصبر دواه
وتقربع والداء عمال
في عضام الابعد نحال
وتخلف للبؤس عيال
وبهيه صبية يا ولداه
آدي البير وآدي غطاه
والبلي بم بم والبلي باه
قال لك إيه
قال لك آه
***
بعد الكشف بميكروسكوب
شفنا التوب وما تحت التوب
تشكيلة امراض عشناها
واليكم في اللآتي دواها
وصفة عجيبة
من تركيبة بلدي
يا بلد البلي بلي باه
قال لك إيه
قال لك آه
***
وجع الراس ح نعالجه بإيه؟
قالك تدي التاس القوت
قالك طب والجهل يا بيه؟
قالك سيب الكمة تفوت
قالك طب حتفوت إزاي؟
قالك لما الضلمة تموت
طب والضلمة تموت إزاي؟
قالك لازم بالنبوت
والنبوت حنجيبه منين؟
قالك لما نهز التوت
قالك قدر خفنا نهز؟
قالك نشرب صبغة يوت
حتطهر أيوب من صبره
وتفجز كبد المكبوت
وتفوق يونس من نومه
ويفلفص من بطن الحوت
آدي البير
وآدي غطاه
وآدي وجعنا
وآدي دواه
البلي بم بم
والبلي باه
قال لك إيه
قال لك آه
0 تعليقات