يا ريحان لـ مظفر النواب

أشكد نده ...
نكط على الضلع
ونسيت أكلك .. يمته
أشكد رازقي ونيمته
وأشكثر هجرك عاشر
ليالي الهوى وما لمته
غنت سحنت الليل
بكليبي
وكلش موش أنت
***
يامه التراجي مرجحن
حسك الصافي وغفه
ويامه الدمع ضوه سواد العيون
جانب ترفه
وتدري تنيت الدفو
بلهفه ورده
وما جيت ونيمني الثلج ...
والشته كله أتعده
لا بالمحطة رف ضوه و لاخط جانه من البعد
لا ريل مر على السده
والشته كله تعده كله تعده
وأعلكنه للصيف اليجي
روازينه السمره ...
شمع
من ينزل أول الدفو بنيسان
يهتز نبع
يمكن يخضر دمع ...
يمكن بعد بالروح يا ريحان وصلة تنزرع
والكيظ أجانه وأنكضه ورد أنكضه
ورد كيظ أجه
والزلف هجرك فضفضه
ورد فضفضه
وما مش رجه
***
ولساع من همسه جي من بعيد
يخضر دمع
كل نسمة ترفه من تفك الباب
يخنكني الدمع
لساع .. ولذته أنكضت
أهجس على الكصايب شمع
وردود أكلك .. يمته؟؟
أشكد رازقي
ونيمته
أملني يسمر بيك
كل عمري أنكضه وأملته
حنه خيالك بالحلم
خايف يجي وأمنته
***
كل لحظة من هذا العمر
وعت حسافه بكلبي
يا أول الريحان يلعطيت
نويه بدروبي
ي آخر سوجي حنيني وحبي
من يوم طيفك هجر نومي ما نمت
حنية يا جذاب منك
ما شفت
من ظني كضك بالحلم
عنبر فحت
من ردت أجيسك جست روحي
وفرفحت
أترف من أجفاف المهر
قندون ... ما ضايك شكر
يا حلو يا بوسة سهر ...
يا ترف يا ييزي قهر
شيضرك .. بكل شته الولهان
لو صحوة مطر؟
والشته كله تعده
والكيظ هم أتعده
شجاب العشك؟ وأشوده؟
لا بالحطة رف ضوه ...
لا خط أجانه من البعد
لا ريل مر على السده
***
ولساع ... مشدوده شبكتك
عل الخصر
والركبه من تلتاف للبوسه
جسر
بس أنت تدري شون رصعة بالنحر
والشته شايل شليله
من يمنه وعبر
واسألته يا شته العشاك
ما عندك خبر
لك يا شته العشاك ما عندك خبر؟
والكي أجانه وأنكضه ورد أنكضه
ورد كيظ أجه
والزلف هجرك فضفضه
ورد فضفضه
وما مش رجه