شعبان البقال لـ أحمد فؤاد نجم

شعبان البقال
عقبال الأنجال

اتوظف واتنظف
واتعدل له الحال

***
من بعد الجلابية
والفوطة الدبلان

في رقبته المهرية
من هبش الأكلان

والدوخة الأزلية
والنوم في الدكان

بقى صاحب عربية
وعمارة وسكان

***
تلقاه للصبحية
سهران ع الكونكان

وينام للعصرية
كبقيت الأعيان

وسألت الخضرية
وبتوع الدخان

ع الحكمة الإلهية
في نظافة شعبان

وعرفت إن أخانا
شعبان ابن بهانة

إتجوز فنانة
واتعين فنان!