الربيع لـ أحمد فؤاد نجم

يطوف الربيع
صغير بديع
وينهي المطاف
إذا العدل طاف
وشاف الجميع

***
تعيش الزهور
إذا الدنيا نور
وتملا الخمايل
وتطرح مودة
عدد كل وردة
و تعمل عمايل

***
بحبك يا بلدي
وأحبك ربيع
شبابك مصحصح
وجوك بديع
ونيلك موافي
لحد الحوافي
يسافر بوافر
ويسقي العطاشى
شجر تمر حنة
وشجر دقن باشا
وتخضر أرضك
بطولك وعرضك
وتعلا السنابل
وتكسي الغيطان
وتشدي البلابل
وتملا الودان
يا مصر انتي جنة
ربيعك فتنا
مشاتل مشاتل
سنابل وحنة

***
مجرد أماني
يا قلبي يا والع
ما دام إنت تاني
مخضر وطالع
بلون الربيع
يطوف الربيع